ສະມາຄົມການເງິນຈຸລະພາກລາວ – ສມກຈ

Lao Microfinance Association – LMFA

ກອງປະຊຸມໃຫຍ່ສະມາຊິກ ສມກຈ ຄັ້ງທີ 3, ວັນທີ 25/08/2023

ກອງປະຊຸມໃຫຍ່ສະມາຊິກຂ​ອງສະມາຄົມການເງິນຈຸລະພາກລາວ (ສມກຈ) ຄັ້ງທີ 3 ໄດ້ຈັດຂຶ້ນໃນວັນທີ 25 ສິງຫາ 2023 ທີ່ ສູນຝຶກອົບຮົມສູນກາງແນວລາວສ້າງຊາດ. ຈັດຮ່ວມໂດຍ  ທະນາຄານ ແຫ່ງ ສປປ ລາວ ແລະ ສະມາຄົມການເງິນຈຸລະພາກລາວ ໂດຍພາຍ​ໃຕ້​ການປະທານ ຂອງທ່ານ ພູຂົງ ຈັນທະຈັກ ຫົວໜ້າກົມຄຸ້ມຄອງສະຖາບັນການເງິນທີບໍ່ແມ່ນທະນາຄານ, ທະນາຄານແຫ່ງ ສປປ ລາວ.

ເຂົ້າຮ່ວມມີ ​ທ່ານ ນາງ ສົມມະໄລ ວົງຄຳຊາວ ຮອງຫົວໜ້າກົມຄຸ້ມຄອງສະຖາບັນການເງິນທີ່ບໍ່ແມ່ນທະນາຄານ, ຄະນະສະພາບໍລິຫານ ສມກຈ, ຄະນະທີ່ປຶກສາກິດຕິມະສັກ, ຄະນະອໍານວຍການ ສມກຈ ພ້ອມດ້ວຍ ສະມາຊິກ ສະມາຄົມ ເຂົ້າຮ່ວມທົ່ວປະເທດ ຈໍານວນ 93 ​ທ່ານ.

ໃນກອງປະຊຸມຄັ້ງ​ນີ້; ທ່ານ ປະທານສະພາບໍລິຫານ ໄດ້ລາຍງານເຄື່ອນໄຫວວຽກງານ ຂອງ ສະມາຄົມ ໃນໄລຍະ 5 ປີຜ່ານມາ (2018-2023) ການລາຍງານໄດ້ຍົກໃຫ້ເຫັນ ຜົນສໍາເລັດ ແລະ ສີ່ງທ້າທາຍ ຕະຫຼອດໄລຍະການຂັບເຄື່ອນສະມາຄົມຈົນມາຮອດປັດຈຸບັນ ແລະ ພ້ອມນັ້ນທ່ານກໍ່ໄດ້ ເໜັ້ນໜັກ ກ່ຽວກັບ ວິໄສທັດ, ພາລະກິດ, ຍຸດທະສາດ ຂອງ ສະມາຄົມໃນອະນາຄົດ.

ແລະ ໃນກອງປະຊຸມໃນຄັ້ງນີ້ ຄະນະສະພາບໍລິຫານ ຍັງໄດ້ມອບໃບຍ້ອງຍໍໃຫ້ແກ່ ຄະນະກວດກາພາຍໃນ, ຄະນະທີ່ປຶກສາກິດຕິມະສັກ ໃນການປະກອບສ່ວນໃນວຽກງານຜ່ານມາ ກໍ່ຄືປະກອບສ່ວນ ໃນຂະແໜງການເງິນຈຸລະພາກ ໃນ ສປປ ລາວ ເວົ້າລວມ ເວົ້າສະເພາະ ກໍ່ຄື ສະມາຄົມການເງິນຈຸລະພາກລາວ ແລະ ມອບໃບຍ້ອງຍໍໃຫ້ແກ່ ອະດີດ ຜູ້ອຳນວຍການ ສມກຈ ທີ່ມີຜົນງານດີເດັ່ນໃນການຊີ້ນຳນຳພາປະກອບສ່ວນເຂົ້າໃນວຽກງານການເງິນຈຸລະພາກ ໂດຍສະເພາະ ສມກຈ ໄລຍະແຕ່ປີ 2013 ຫາ 2023; ຈາກນັ້ນ ກໍ່ມີການລົງຄະແນນສຽງປ່ອນບັດ ເລືອກຕັ້ງເອົາຄະນະ ສະ​ພາບໍລິຫານງານສະມາຄົມ-ຄະນະກວດກາພາຍໃນສະມາຄົມຊຸດ ໃໝ່ ຊຶ່ງ​ລ້ວນ​ແຕ່​ມີ​ປະ​ຊາ​ທິ​ປະ​ໄຕ ແລະ ຜົນການເລືອກຕັ້ງໃນຄັ້ງນີ້ແມ່ນ ທ່ານ ສົມ​ພອນ ສີ​ແສງ​ລັດ ​ເປັນ​ປະ​ທານສະພາບໍລິຫານ; ທ່ານນາງ ​ຈັນ​ເພັງ ລີລາວົງ ເປັນຮອງປະທານ, ທ່ານ ສັນຕິ ອຸ່ສິດທິເດດ ເປັນຮອງປະທານ,  ທ່ານ ອະລຸນໂນໄທ ສຸລິເມືອງຈັນ ແລະ ທ່ານ ສຸພົນ ລາຊະພົນ ເປັນ​ຄະ​ນະ ແລະ ຄະນະກວດກາພາຍໃນ ສະມາຄົມ ໄດ້ແກ່ ນາງ ແສງມະນີ ມະນີວົງ ປະທານ, ທ່ານ ນາງ ອີນປັນ ພົມມະທອງ ເປັນຮອງປະທານ ແລະ ທ່ານ ນາງ ສຸທານິນ ແສງອາລີ ​ເປັນຄະນະ.

ທ່ານ ປະທານກອງປະຊຸມ ໄດ້​ຕີ​ລາ​ຄາ​ສູງ​ຕໍ່​ຜົນ​ການ​ເຄື່ອນ​ໄຫວວຽກງານ​ຂອງ ສມກ​ຈ ກໍ​ຄື​ຄະ​ນະ​ສະ​ພາ​ບໍ​ລິ​ຫານ ຊຸດ​ເກົ່າ ​​ທີ່ມີ​ຜົນ​ງານໃນຫຼາຍ​ດ້ານ ປະ​ກອບ​ສ່ວນ​ເຂົ້າ​ໃນ​ແຜນ​ພັດ​ທະ​ນາ​ເສດ​ຖະ​ກິດ​ຂອງ​ຊາດ, ພ້ອມນັ້ນ ທ່ານຍັງໄດ້ຮຽກຮ້ອງໃຫ້ບັນດາ ສະມາຊິກ ສມກ​ຈ ຈົ່ງສຶບ​ຕໍ່​ປະ​ຕິ​ບັດ​ລະ​ລະ​ບຽບກົດ​ໝາຍ, ແລະ ມີສະຕິລະວັງຕົວ ຕໍ່ການ​ເຄື່ອນ​ໄຫວ​ຂອງ​ກຸ່ມ​ຄົນ​ບໍ່​ດີ​ທີ່​ແອບ​ອ້າງ​ການ​ເງິນ​ຈຸ​ລະ​ພາກ​ໄປ​ໃນ​ທາງ​ທີ່ບໍ່​ຖືກ​ຕ້ອງ; ນອກນີ້ ຕ້ອງສ້າງ​ຄວາມ​ເຂັ້ມ​ແຂງ​ໃຫ້​ແກ່​ວຽກ​ງານ​ການ​ເງິນ​ຈຸ​ລະ​ພາກ​ສູງ​ຂຶ້ນ ແລະ ຮັບ​ໃຊ້​ສັງ​ຄົມ​ໃຫ້​ຖືກ​ຕ້ອງ​ຕາມ​ລະ​ບຽບ​ກົດ​ໝາຍ ແລະ ຍັງໄດ້ຊຸກຍູ້ໃຫ້ ສະມາຊິກ ສມກຈ ກະ​ກຽມ​ຄວາມ​ພ້ອມ​ເຂົ້າ​ເປັນ​ສະ​ມາ​ຊິກ​ສູນ​ຂໍ້​ມູນ​ຂ່າວ​ສານ ແລະ ເປັນ​ສະ​ມາ​ຊິກກອງ​ທຶນ​ປົກ​ປ້ອງ​ຜູ້​ຝາກ​ເງິນ ທັງ​ນີ້ກໍ່​ເພື່ອ​ຜົນ​ປະ​ໂຫຍດ​ຂອງ​ສະ​ຖາ​ບັນ​ການ​ເງິນ​ຂອງ​ຕົນ​ໃນ​ຕໍ່​ໜ້າ.