ສິດ ແລະ ໜ້າທີ່ຂອງຄະນະບໍລິຫານ

• ກຳນົດລະບຽບການຕ່າງໆ ອີງຕາມກົດຂອງສະມາຄົມ ແລະ ກົດໝາຍຂອງລັດ ເພື່ອຮັບປະກັນວ່າສະມາຊິກສະມາຄົມປະຕິບັດຕາມລະບຽບການດັ່ງກ່າວ;

• ຄັດເລືອກ, ແຕ່ງຕັ້ງ ແລະ ປົດຕຳແໜ່ງຜູ້ອຳນວຍການ / ຫົວໜ້າຫ້ອງການເລຂາທິການ ແລະ ອະນຸມັດຫົວໜ້າໜ່ວຍງານ ແລະ ພະນັກງານຂອງສະມາຄົມ;

• ອະນຸມັດແຜນຍຸດທະສາດ, ແຜນປະຕິບັດງານ, ໂຄງການ ແລະ ໂຄງການຍ່ອຍຂອງສະມາຄົມ;

• ແຕ່ງຕັ້ງທີ່ປຶກສາ ຫຼື ຄະນະກຳມະການຍ່ອຍ, ແຕ່ຜູ້ທີ່ຖືກແຕ່ງຕັ້ງດັ່ງກ່າວຈະດຳລົງຕຳແໜ່ງພາຍໃນການດຳລົງຕຳແໜ່ງຂອງຄະນະບໍລິຫານທີ່ໄດ້ແຕ່ງຕັ້ງພວກເຂົາເຈົ້າ;

• ເຊີນປະຊຸມສະພາທົ່ວໄປ, ປະຊຸມສະພາພິເສດ, ປະຊຸມປະຈຳປີ ແລະ ປະຊຸມຄະນະບໍລິຫານ;

• ກຳນົດທິດທາງຍຸດທະສາດ ແລະ ຄຸ້ມຄອງການດຳເນີນງານຂອງສະມາຄົມ ເພື່ອຮັບປະກັນວ່າເປົ້າໝາຍທີ່ວາງໄວ້ບັນລຸໄດ້;

• ຮັບຜິດຊອບຕໍ່ການດຳເນີນງານໂດຍລວມຂອງສະມາຄົມ ລວມທັງເລື່ອງການເງິນ ແລະ ຊັບສິນທັງໝົດຂອງສະມາຄົມ;

• ອະນຸມັດ ແລະ ຢັ້ງຢືນເອກະສານກ່ຽວກັບບັນຊີການເງິນ, ຊັບສິນ ແລະ ການດຳເນີນງານຂອງສະມາຄົມຕາມຫຼັກການດ້ານວິຊາການ ແລະ ຮັບຜິດຊອບຕໍ່ສະມາຊິກຜ່ານການກວດສອບຈາກຄະນະກວດສອບ ຖ້າຈຳເປັນ;

• ລົງນາມເອກະສານທີ່ກ່ຽວຂ້ອງ ແລະ ບົດບັນທຶກການປະຊຸມຂອງສະມາຄົມ, ຮັກສາໄວ້ເປັນຫຼັກຖານ ແລະ ແບ່ງປັນໃຫ້ສະມາຊິກ ແລະ ອົງການທີ່ກ່ຽວຂ້ອງຂອງລັດ;

• ສິດ ແລະ ໜ້າທີ່ອື່ນໆຕາມທີ່ກຳນົດໄວ້ໃນກົດຂອງສະມາຄົມ;

ຜູ້ອຳນວຍການ ຫຼື ຫົວໜ້າຫ້ອງການສະມາຄົມ

• ຄຸ້ມຄອງການດຳເນີນງານປະຈຳວັນຂອງສະມາຄົມ;

• ສະເໜີຄຳຄິດເຫັນ, ຄຳແນະນຳ ແລະ ຄຳສະເໜີຕໍ່ປະທານ, ຮອງປະທານ ແລະ ຄະນະບໍລິຫານກ່ຽວກັບບັນຫາຕ່າງໆ;

• ກະກຽມລາຍງານລາຍເດືອນ, ລາຍງານລາຍ 3 ເດືອນ, ລາຍງານ 6 ເດືອນ ແລະ ລາຍງານປະຈຳປີ ແລະ ສະເໜີຕໍ່ຄະນະບໍລິຫານສະມາຄົມ ຫຼື ຕໍ່ອົງການທີ່ກ່ຽວຂ້ອງຂອງລັດ;

• ສ້າງເງື່ອນໄຂແວດລ້ອມທີ່ເອື້ອອຳນວຍ, ສະດວກໃຫ້ແກ່ການດຳເນີນງານຂອງສະມາຄົມ ແລະ ສະໜັບສະໜູນວຽກງານຂອງຄະນະບໍລິຫານ ແລະ ຄະນະກວດສອບ;

• ປະສານງານກັບສະມາຄົມອື່ນ ແລະ ອົງການທີ່ກ່ຽວຂ້ອງອື່ນໆ ລວມທັງອົງການຂອງລັດ ແລະ ອົງການຈັດຕັ້ງສາກົນ ຕາມການມອບສິດອຳນາດຈາກປະທານ ຫຼື ຄະນະບໍລິຫານ;

• ກະກຽມຂໍ້ສະເໜີຂໍທຶນຮອງຮັບຮ່ວມກັບຜູ້ປະສານງານໂຄງການ ແລະ ພະນັກງານດ້ານວິຊາການ;

• ຄວບຄຸມ ແລະ ປະເມີນຜົນງານຂອງແຕ່ລະໜ່ວຍງານໃນສະມາຄົມ;

• ຄົ້ນຫາຫົວໜ້າແຕ່ລະໜ່ວຍງານ ແລະ ພະນັກງານອື່ນໆ ແລະ ສະເໜີຕໍ່ຄະນະບໍລິຫານ;

• ກະກຽມງົບປະມານຮ່ວມກັບຫົວໜ້າໜ່ວຍງານ ແລະ ຂໍອະນຸມັດງົບປະມານສຳລັບແຕ່ລະໂຄງການ ຫຼື ໜ່ວຍງານ ອີງຕາມຫຼັກການດ້ານການເງິນຂອງສະມາຄົມ;

• ກະກຽມການປະຊຸມສາມັນ ແລະ ປະຊຸມສະພາພິເສດຮ່ວມກັບຄະນະບໍລິຫານ.